Egileak izendatzen

Hasiera batean blog pertsonala zena talde baten bloga -gelaren bloga, hain zuzen- bihurtzeko, administratzaileak, hau da, irakasleak, egileak izendatu behar ditu. Horretarako, ikasleek posta kontu bana izan behar dute. Ez diet azalduko zelan zabaltzen diren, neuk egingo dut azalpen larregi eman beharrean ez ibiltzeko. Aurrerago ikasiko dute.

Kontuok baldintza batzuk bete behar dituztela uste dut:

• Kontu pertsonalak badira ere, eskolakoak direla hartu behar da kontuan. Horrek esan gura du haien helburu nagusia eskolarekin zerikusia duten lanak, informazioak... bideratzea dela. Mezu pertsonalek ez lukete lekurik izan beharko kontu hauetan.


• Bai irakasleak eta bai gurasoek ere helbidea eta erabiltzailearen pasa-hitza ezagutuko dute eta behar duten edozein momentutan sartu ahal izango dira.

Helbide elektronikoak eta pasa-hitzak errez gogoratzeko sistema bat ezarri beharko da. Asmatutakoak, agian, konplikatua eman dezake, baina ez dut uste horrela denik, eta, gainera, gogoratzeko erreza izateaz gain, gelakideena asmatzeko zaila dela uste dut.


"Zerrenda sarrera honetan utziko dut apuntaturik eta, noski, ikusteko aukera kenduko diot".

Hori zen hasieran nuen asmoa. Geroago konprobatu dut ezinezkoa dela sarrera bat ikusi gabe uztea (hala dela uste dut). Beraz, zerrenda beste nonbait gordeko dut.

Orain bai, kontuak zabalduko ditut eta, gero, egileak izendatuko.

Jose

Eginda dago lana.

"Prestaketan" blogean aldaketak!

Kitto! Buelta larregirik ez diot emango. Lehen mailako taldekoei (etxe gorrikoei) gelditzen den ikasturte erdiko lanak blog baten jasotzea proposatuko diet eta, egindakoa baloratu ondoren, ikusiko dugu datorren ikasturtean esperientziaz jarraitu eta zabaltzen dugun. Horregatik egon dira zenbait aldaketa -izena barne- blogaren itxuran. Azalekoak izan dira, baina gustura nago orriak hartu duen tankeraz. Argazkia aldatu beharko dut, akaso. Ordiziakoenaren kopia dela ematen du, ezta?

Beno, egin beharrekoak:

• Ikasleak "egile" bihurtu. Horretarako Gmaileko kontua zabaldu behar zaiela uste dut, gainera, ondo egon daiteke posta elektronikoaz lan apur bat egiteko. (Hizkuntza? Mintegian komentatuko dut). Ikasle pare batekin hasiko naiz eta lehen ebaluazioko lan batzuk igoko menperatzen dudan konprobatzeko eta orriak zelako itxura hartzen duen ikusteko.
• Ebaluazioetako proiektuez gain, zelako idazlanak izan daitezkeen aproposak blogean erakusteko erabaki eta, haien arabera, etiketak antolatu.
• Ikastetxeko ordenagailuen eskuragarritasuna eta ikasleek etxean ordenagailurik eta interneteko konexiorik duten aztertu.
• Unitate labur bat prestatu ikasleei blog baten zelan jarduten den irakasteko.

Eta pare bat gauzatxo:

• Ikasleekin lanean hasten naizenean, hasieran behintzat, bloga taldekideok bakarrik ikusteko moduan utziko dut. Gorkari komentatu beharko diot, ikastaroko zerrendatik kentzeko, edo blog berria egin.
• Ez dakit zer egin dudan mezuei erantzun ahal izateko testuaren azpian agertu beharko litzatekeen aukerarekin. Konpondu behar dut.

Ondo izan.

Jose

Pare bat pausu aurrerago

Trasteatzen ibili naiz Bloggerrek ematen dituen pertsonalizazio-aukeren artean eta zeozer aurkitu dut. Azpimarratzekoak:

• Etiketak: Haien bitartez, ondo ulertu badut, idatzitakoak (Oharrak, mezuak, gutunak...? Zelan esaten diete?) sailkatuta eta gaien arabera errez aurkitzeko moduan gordetzeko (?) sistema osa daiteke. Karpeten ordezkoak edo.
• Egileak ("autor", uste dut): Blogak ez du zertan pertsonala izan, idazle-talde bat aritu daiteke bertan. Administratzaile bat dago eta berak erabakitzen du nor bai eta nor ez.
• Irakurleak/ikusleak ere murriztu/zehaztu daitezke.

Beno, horiek guztiek zer pentsatu ematen dute eta blog batek zelan funtziona dezakeen imajinatzen laguntzen dute.

Pertsonalizazioa dela eta, pare bat berrikuntza: blogei buruzko esteken zerrenda osatzen saiatuko naiz, batetik, eta etiketa batzuk sortuko ditut, bestetik. Oraingoz, "Edukiaz" (nor, zertan... planifikatu behar den blogean) eta "Garatzeaz" (bloga zelan eraiki, alde teknikoa).

Eta amaitzeko, ea lortzen dudan irudia eta hiperesteka txertatzen. Bloggerren sartu naiz aulaclic webgunean hari buruzko artikulu erraz eta interesgarri bat irakurri ondoren, blogari.net-en nahiko galduta ibili naizelako. Aulaclic-en behin baino gehiagotan ibili izan naiz gauza desberdinak ikasten eta gomendagarria dela uste dut. Hona hemen irudia:

Ez dakit irudiari ere hiperesteka ezarri dakiokeen. Baietz uste dut. Ikusiko dugu.

Ondo segi.

Jose

Zer prestatu behar dugu, ba?

Lan ederra agindu digu Gorkak! Nik ez dakit burutu ahal izango dudan, baina zer edo zer egiten saiatuko naiz. Hasteko, baldintza bi. Froga mezurik ez eta zerbait interesgarri idatzi. Beno, lehena betetzeko, helburu bat ezarriko diot nire lehen blog honi, eta, betetzen den heinean, interesgarri bihurtuz joango da, agian, apurka-apurka.



Non edo non blog batzuk egilearen egunkari gisa, bere esperientziak eta hausnarketak jasotzeko planteatuta daudela irakurri dut. Nire bloga ere halakoxea izango da. Bertan neure burutazioak utziko ditut idatzirik, nonbait lasai egon daitezen, besterik ez bada. Baina irudimen handiko pertsona ez naizenez, gai zehatz eta xumea ezarriko diot neure buruari: ze arraiotako behar dut nik, neure lanean, blog bat eta nola gauza dezaket "penagarri" mailatik goraxeago sailka litekeen halako bat.



Zer prestatu behar dugun? Ba, horixe bera: blog bat. Blog bat planifikatzen eta, aldi berean, zelan egiten den ikasten saiatuko naiz. Horixe izango da burutu beharreko lana, eta betetzen dudan bitartean, nire blog hau izango da oharrak hartzeko erabiliko dudan koadernoa.



Beno, iradokizunak jasotzea espero dut.



Jose.